ALGEMENE DOELSTELLINGS

Die doel van die driejarige program is om skeppende uitvoerende en tegniese personeel te lewer vir die Suid-Afrikaanse teater- en mediabedryf, asook verwante terreine (bv. onderwys, skakelwese, joernalistiek en kultuursake). Dit is belangrik om daarop te let dat die opleiding in die eerste twee jaar van studie hoofsaaklik fokus op drama of teater in die tradisionele sin as verhooggesentreerde uitvoerende kuns. In die derde jaar van opleiding val die fokus egter ook op die uitvoerende kunste en die vermaaklikheidsbedryf in die breër sin (insluitend aspekte soos radio, televisie, film, kabaret, woordkuns, revue, musiekteater, gemeenskapsteater, sosiodrama, psigodrama, opvoedkundige teater, fisieke teater en/of industriële teater).

SPESIALISERINGSTERREINE

• Spel- en spelverwante opleiding:

Toneelspel, beweging, stemwerk en spraak, toneelskryf, musikale teater en kabaret, poppespel, fisieke teater, interaktiewe teater (teater en drama in die onderwys, gemeenskapsteater, teater vir ontwikkeling), en/of spel vir die kamera en radio.

• Tegniese en bestuursopleiding:

Verhoog- en produksiebestuur, stel, kostuums, rekwisiete, beligting, klank, ontwerp, bemarking en elektroniese media.

TOELATINGSVEREISTES

• Voldoen aan die Fakulteit Lettere en Sosiale Wetenskappe se hoofstroom toelatingsvereistes:
• NSS met minstens 'n 4 (50%) in elk van vier NSS-universiteitstoelatingsvakke
• 'n Gemiddelde van minstens 60% vir die TGT's en NSS (uitgesluit Lewensoriëntering) gesamentlik in die verhouding 40:60
• Huistaal minstens 4 (50%)
• Eerste Addisionele Taal minstens 4 (50%)
• Suksesvolle aflegging van die keuringsproses vir die B.Dram-program:
• Geskrewe opdrag en akademiese profiel
• Persoonlike oudisie en/of onderhoud
• Dramatiese Kunste as skoolvak is nie 'n vereiste nie.