Gaste kon ook uurlange parallelle lesingsessies bywoon met interessante gesprekke oor ʼn verskeidenheid onderwerpe - Alternatiewe provinsiale grense vir Suid-Afrika – ʼn Logistieke aanslag (prof. Hannelie Nel), Herwinbare energiegeleenthede: oorgange na ʼn volhoubare Afrika (prof. Alan Brent), Leierskap-vereistes vir die volhoubaarheidsuitdaging (dr. Arnold Smit), Hoe om die kurperhengelaar se hoek te ontduik (prof. Rika Butler), Generasie Y besig om speel-speel te werk (mnr. Len Steenkamp), Hoe om kliënte te behou en langtermyn winsgewendheid (prof. Nic Terblanche) en Die verwesenliking van Suid-Afrika se ekonomiese potensiaal in die 21ste eeu (prof. Rachel Jafta). Daar was ook ʼn paneelbespreking Sake van die dag en toekomstige uitdagings in die bedryfsielkunde deur proff. Amos Engelbrecht, Ronel du Preez en Callie Theron met prof. Johann Malan as gespreksleier.
Uit die sprekers se lesings, was dit duidelik dat die natuurlike omgewing en volhoubaarheidsbeginsels sentraal moet staan in die sakewęreld. Dr. Arnold Smit van die USB het onder meer gesę leierskap in die sakewęreld behels dat gehoor gegee word aan die vereistes van volhoubaarheid. Hier geld twee beginsels: Op biologiese vlak moet geleer word om om aan te pas by die wette van die natuur en op politieke vlak moet daarna gestreef word om materiële standaarde te verbeter deur alternatiewe ekonomiese beginsels toe te pas. Ons huidige opset stel die gemeenskap en omgewing ondergeskik aan die dwang van ekonomiese groei en vooruitgang met ernstige skadelike gevolge vir veral die omgewing. Dit is onvolhoubaar. Ons benodig ʼn nuwe paradigma van balans tussen ekonomie, gemeenskap en omgewing. Dit kan net gebeur as ons ʼn ekonomiese model vind wat pas binne die moontlikhede wat ʼn beperkte omgewing vir ons toelaat.
Daar is ook in twee afsonderlike lesings verwys na Generasie Y, oftewel die millenniums, en die eise wat hulle na die werkplek toe bring.
Mnr. Len Steenkamp van die Departement Rekeningkunde het gesę die generasie (wat ongeveer tussen 1978 en 1996 gebore is) is verslaaf aan positiewe terugvoer. Dit is dus noodsaaklik dat werkgewers meer gereeld prestasiebeoordelings moet gee.
Die generasie word sterk gevorm deur hul ouers, wat beskryf word as helikopter ouers. Die ouers is deurentyd in die agtergrond besig om hulp en raad aan die jong mense te gee. In Amerika is dit byvoorbeeld algemeen vir ouers om hul kinders se werkgewers te bel en navraag te doen oor waarom hul kind nie bevorder is of swak evaluerings gekry het.
In haar lesing het Ronel du Preez, mede-professor aan die Departement Bedryfsielkunde gesę die generasie verwag om volgens prestasie vergoed te word in die werkplek. Hulle is nie bereid om onder te begin en jare lank te wag voordat hulle met die uitvoerende hoof van die maatskappy kennis maak nie. Hulle wil dit onmiddellik doen. Die generasie wil vroeg in hul loopbaan al kontak maak met mense wat hulle kan help om hul loopbaandoelwitte te bereik.
Korrupsie en slenters was nog ʼn gewilde onderwerp. In sy voorlegging het prof. Amos Engelbrecht, van die Departement Bedryfsielkunde daarop gewys dat Suid-Afrika van die hoogste korrupsievoorvalle ter węreld het. Hy het ʼn pleidooi gelewer dat sakeleiers ʼn kultuur van etiese gedrag in hul maatskappye vestig en mense identifiseer wat morele en etiese leierskap kan bied.
Prof. Rika Butler, van die Departement Rekeningkunde het oor kuberhengel (phishing) en die metodes wat kuberhengelaars inspan om slagoffers om die bos te lei as ʼn vorm van diefstal gepraat. Die meeste voorvalle van kuberhengel kom in die betalingsektore (37%) voor, gevolg deur die finansiële sektor (35,9%), gevolg deur “ander sektore” (17,9%), veilings (8,3%) en kleinhandel (0.9%).
Butler het ook verskeie voorbeelde gewys van waarna verbruikers moet oplet om hulself teen kuberhengelaars te beskerm.
Prof. Johan de Villiers, dekaan van die Fakulteit, was hoog in sy skik met die verloop van die Alumnidag.
“Die terugvoering was uiters positief. Dit is belangrik om nie net studente en alumni nie, maar ook die ouers by die Fakulteit-familie te betrek. Dit was opvallend hoe alumni die geleentheid aangegryp het om hul ou vriende op te soek en hul herinneringe te deel.”
